“Qarabağ”ın növbəti rəqibi “Ferenstvaroş”u yaxından tanıyaq

Azərbaycan çempionu “Qarabağ” UEFA Çempionlar Liqasının III təsnifat mərhələsində “Şkendiya” üzərində qələbə qazanaraq pley-off mərhələsinə yüksəlib.

Son raundda “Köhlən atlar”ın rəqibi Macarıstan təmsilçisi “Ferentsvaroş” olacaq.

1899-cu ildə Budapeştin Ferentsvaroş rayonunda qurulan “Ferentsvaroş” Macarıstanın ən titullu klublarındandır. “Frodi” və “yaşıl qartallar” ləqəbləri ilə tanınan komanda ev oyunlarını 22 000 tamaşaçı tutumlu “Qrupama Arena”da keçirir.

UEFA reytinqində 55-ci pillədə qərarlaşan klubun baş məşqçisi İrlandiya millisinin və “Liverpul”un sabiq hücumçusu Robi Kindir. Onun komandası əsasən 3-4-3 sxemi ilə çıxış edir.

“Qarabağ” və “Ferentsvaroş” daha əvvəl 2022-ci il Çempionlar Liqasında qarşılaşıb. Bakıdakı oyun 1-1 hesabı ilə başa çatmış, səfərdə isə Qurban Qurbanovun komandası 3-1 qələbə qazanmışdı. 2023-cü ildəki yoxlama görüşündə isə 3-3 bərabərlik qeydə alınmışdı.

“Ferentsvaroş” pley-off yolunda əvvəlcə Ermənistanın “Noa” klubunu ümumi 6-4 hesabı ilə, ardından Bolqarıstanın “Ludoqorets” komandasını 3-0 hesabı ilə məğlub edib. Komandanın ən təhlükəli oyunçuları hücumçular Barnabas Varqa və Lenni Cozefdir.

“Qarabağ” “Ferentsvaroş”a qarşı ilk oyununu avqustun 19-u səfərdə, cavab qarşılaşması isə avqustun 27-si Bakıda keçiriləcək.