"Barselona"nın ulduz futbolçusu üçün 75 milyon avro

Cari mövsümdə qeyri-sabit çıxışı ilə diqqət çəkən və Bundesliqadakı çempionluq yarışında “Bayer”dən 10 xal geri qalan “Bavariya” heyətini gücləndirməyə hazırlaşır.

“Rekordmayster”in transfer hədəflərindən biri “Barselona”nın üzvü Pedridir. Yayılan məlumata görə, münhenlilər keçidə görə 75 milyon avro ödəməyə hazırdır.

Maraq üçün deyək ki, məşhur “Transfermarkt” portalına əsasən, 21 yaşlı futbolçunun dəyəri 90 milyon avrodur. Onun “Barsa” ilə müqaviləsi isə 2026-cı ilədək nəzərdə tutulub.

Qeyd edək ki, 2019-cu ildən kataloniyalıların uğurları üçün çalışan Pedri 22 milyon avroya “Las-Palmas”dan transfer olunub. Geridə qalan mövsümlər ərzində 133 matçda 18 qol vuran oyunçu 12 asistlə yadda qalıb.

“Barselona” ilə İspaniya çempionatı, Kuboku və Super Kubokunda qələbə qazanan Pedri 2021-ci ildən İspaniya millisinə də çağırılır. “Qırmızı furiya”nın heyətində 18 görüşə çıxan yarımmüdafiəçi qol vura bilməyib.