"Fənərbağça" Konfrans liqasında növbəti oyuna çıxıb

“Fənərbağça” komandası Konfrans liqasında növbəti matçına çıxıb.

İstanbul təmsilçisi 1/4 finalın cavab görüşündə “Olimpiakos”u qəbul edib.

“Şükrü Saracoğlu” stadionunda keçirilən oyunda hesab 11-ci dəqiqədə açılıb. İrfan Can Kahveci Türkiyə klubunu irəli çıxarıb. Əsas vaxtda başqa qol olmayıb.

Tərəflər arasında ilk qarşılaşma Yunanıstan kollektivinin 3-2 hesablı qələbəsi ilə bitdiyi üçün əlavə 30 dəqiqə oynanılıb. Ancaq komandalar burada da fərqlənə bilməyiblər.

11 metrlik zərbələrdə isə “Fənər”in heyətində Duşan Tadiç, Cengiz Ündər və Leonardo Bonuççinin cəhdi uğursuz olub. Nəticədə penaltilər seriyasında 3-2 hesabı ilə güclü olan “Olimpiakos” yarımfinala adlayıb.

Pirey şəhərinin təmsilçisi bu mərhələdə “Aston Villa” ilə üz-üzə gələcək. Digər qarşılaşmada isə “Fiorentina” və “Brügge” futbolçuları finalçını müəyyənləşdirəcək.

Qeyd edək ki, Konfrans liqasında yarımfinalın ilk matçları mayın 2-si, cavab görüşləri isə mayın 9-u baş tutacaq.