"Hacı Əliyevdə bu potensial var" | Güləş tariximizdə iz qoyan idmançı - Baku TV

“Hacı Əliyev müasir Azərbaycan dövrünün və güləş tariximizin ən parlaq nəticələrinə imza atan idmançılarından biridir. O, milli güləşimizə xüsusi töhfə vermiş, tariximizdə öz izini qoymuş güləşçimizdir”.

Bunu Baku TV-yə açıqlamasında idman mütəxəssisi Raqif Abbasov deyib.

Onun sözlərinə görə, böyük nəticələr əldə etmiş idmançılar məşqçilik fəaliyyətinə başlayanda qazandıqları təcrübəni yeni nəslə ötürmək istəyirlər:

“Hər bir uğurlu idmançı məşqçi kimi də Azərbaycan idman tarixinə düşmək, əldə etdiyi nəticələri yetirmələrinə tətbiq etmək istəyər. Hacı Əliyevdə bu potensial var.

Hacı Əliyevin rəhbərliyi altında gənc güləşçilərimiz dünya çempionatına təxminən iki ay qalmış hazırlıqlara başlayıblar. Təbii ki, nəticələrimizin daha yüksək olmasını arzulayardıq. Amma 17 yaşadək idmançıların formalaşması üçün müəyyən zaman tələb olunur.

Sağlam tənqid normaldır, lakin hər bir tənqid əsaslandırılmış məqamlara söykənməlidir. Burada isə nəzərə almaq lazımdır ki, yeni bir mərhələ başlayıb və yeni mütəxəssis fəaliyyətə başlayıb. Eyni zamanda doğma divarlar arasında keçirilən dünya çempionatı kimi məsuliyyətli yarışın yükünü Hacı Əliyev qısa müddət ərzində üzərinə götürüb və bu, yalnız təqdir olunmalıdır.

Əminliklə deyə bilərik ki, Hacı Əliyevin yetişdirdiyi idmançılar arasında gələcəkdə yeni Hacı Əliyevlər formalaşacaq və Azərbaycan güləşinə böyük töhfələr verəcəklər”.