"Neftçi" klubunun loqosu yeniləndi

“Neftçi” Peşəkar Futbol Klubunun loqosu dəyişib.

20 ildən sonra tarixində beşinci dəfə müasirləşən loqo günün dizayn trendlərinə uyğun hazırlanıb.

Rebrendinq zamanı futbol sahəsindəki məşhur və yaddaqalan imic dəyişikliyi halları öyrənilib, bu istiqamətdə ixtisaslaşan dizaynerlərin işləri nəzərdən keçirilib. Həmçinin “xalqın komandası” adlandırılan “Neftçi”nin Azərbaycanın ən köklü klubu olması da diqqətdə saxlanılıb.

Yeni loqoda “Neftçi”nin ilk embleminin konturlarından, klubun adının baş hərfi və neft buruqlarından istifadə edilərək brendin əsas vizual atributu hazırlanıb. Bununla da klubun köklərinə və ənənələrinə sadiqliyi nümayiş etdirilib, eyni zamanda simvola daha modern və cəlbedici görünüş verilib.

Müasirləşən loqonun verdiyi mesajda köklərə bağlılıqla yanaşı, nəsillərarası güclü əlaqə də öz əksini tapıb.