"Neftçi" Premyer Liqada "Sumqayıt"la qarşılaşıb

“Neftçi” komandası Azərbaycan Premyer liqasında növbəti görüşünü keçirib. “Ağ-qaralar” 32-ci turda “Sumqayıt”ın qonağı olub.

Mehdi Hüseynzadə adına Sumqayıt şəhər stadionunda təşkil olunan matçda hesab 23-cü dəqiqədə açılıb. Bobir Abdixolikov meydan sahiblərinə üstünlük qazandırıb. İlk yarıda başqa qol olmayıb.

53-cü dəqiqədə Ronaldo fərqi artırıb: 2-0. Lakin paytaxt klubu ruhdan düşməyərək məğlubiyyətdən xilas olub. Əvvəlcə 1 saatın tamamında Bassala Sambu toplardan birinin əvəzini çıxıb. 88-ci dəqiqədə isə Andrey Ştohrin bərabərlik qolunu vurub.

2-2 hesabı ilə bitən qarşılaşmadan sonra “Sumqayıt”ın aktivində 30 xal var. Komanda çempionatda 8-ci yerdədir. 36 xalı olan “Neftçi” isə 6-cı pillədə qərarlaşıb.

Növbəti turda “ağ-qaralar” “Kəpəz”lə üz-üzə gələcək. “Neftçi Arena”da keçiriləcək oyun mayın 4-ü saat 20:00-da başlayacaq.