"Qarabağ" Rusiya millisinin sabiq üzvünü transfer edib

“Qarabağ” klubu heyətini yeni qapıçı ilə gücləndirib.

“Köhlən atlar” “Bayer Leverkuzen”in sabiq üzvü Andrey Lunyovla 1 illik müqavilə imzalayıb.

Bu barədə klubun rəsmi sosial media hesablarında məlumat verilib. 31 yaşlı qolkiper Ağdam təmsilçisinin heyətində 99 nömrəli formada çıxış edəcək.

Xatırladaq ki, “Qarabağ” ötən mövsüm qış fasiləsində A.Lunyovu heyətinə qatmaq istəsə də, transfer son anda baş tutmamışdı.

Qeyd edək ki, karyerası ərzində “Torpedo Moskva”, “Ufa” və “Zenit” kimi klublarda çıxış edən A.Lunyov bu ilin yayınadək “Bayer”də forma geyinib. 2021-ci ildən oynadığı Leverkuzen komandasında cəmi 3 görüş keçirən Andrey əsas uğurlarını “Zenit”lə qazanıb. Rusiya çempionatının 3 qat qalibi olan A.Lunyov ölkə kubokunda da qələbə qazanıb. 2017-2021-ci illərdə Rusiya millisinə çağırılan qolkiper 7 matçda yığmanın qapısını qoruyub.