"Qarabağ"ın dünya reytinqində yeni mövqeyi açıqlanıb

“Qarabağ” klubu dünya reytinqində 8 pillə geriləyib.

“Köhlən atlar” Beynəlxalq Futbol Tarixi və Statistikaları Federasiyasının hazırladığı siyahıda 60-cı yerdə qərarlaşıb.

Daha əvvəl 52-ci olan Ağdam təmsilçisini “Qalatasaray”, “Mançester Yunayted”, “Real Sosyedad”, “Boka Xuniors”, “Dinamo Zaqreb” və “Lill” kimi məşhur komandalar qabaqlayıb.

Hazırda 174,75 xalı olan Azərbaycan çempionu Almaniyanın “Leypsiq”, Şotlandiyanın “Reyncers” və “Seltik” klublarından, habelə Avropa liqasındakı rəqibi “Ayaks”dan öndədir.

“Qarabağ”la yanaşı, siyahıda daha 2 kollektivimiz yer alıb. “Zirə” reytinqdə 201-ci, “Sabah” isə 411-ci yerdədir.

Qeyd edək ki, ötən ayın yekununa əsasən siyahıya Çempionlar liqasının son qalibi “Real” başçılıq edir. İlk üçlüyün digər pillələrində “Mançester Siti” və “Bayer Leverkuzen” mövqe tutublar.