"Real Madrid"də baş məşqçi postuna daha bir namizəd müəyyənləşdi

Çempionlar liqasında fiasko yaşayaraq “Arsenal”a hər iki oyunda məğlub olan “Real Madrid”də baş məşqçi dəyişikliyinə hazırlıq sürətlənib.

Yayılan məlumatlara görə, İspaniya nəhənginin rəsmiləri tezliklə “Bayer”in çalışdırıcısı Xabi Alonso ilə razılıq əldə etmək niyyətindədir. Bu, baş verməyəcəyi təqdirdə isə “Real” ehtiyat variant kimi “Fənərbağça”nın məşqçisi Joze Mourinyoya müraciət edəcək.

Bildirilir ki, klubun prezidenti Florentino Peres portuqaliyalı mütəxəssisi yenidən komandada görmək fikrinə müsbət yanaşır. Hətta Mourinyonun son vaxtlar ciddi nailiyyətinin olmaması belə Peresi narahat etmir.

Bununla belə, “kral klubu”nun əsas məqsədi yayda keçiriləcək klublararası dünya çempionatına qədər Alonsonu komandanın baş məşqçisi təyin etməkdir. Razılıq olmayacağı təqdirdə isə Mourinyo, Yurgen Klopp və digər namizədlərin dəvət edilməsi nəzərdən keçiriləcək.