"Real Madrid"in "Barsa" ilə matçdan əvvəl sınağı

La Liqada çempionluq mübarizəsini davam etdirən “Real Madrid” 32-ci turda çətinliklə qələbə qazanıb.

“Kral klubu” “Santyaqo Bernabeu” arenasında “Atletik”i qəbul edib.

Qarşılaşmanın ilk hissəsində əsasən bərabər səviyyəli mübarizə gedib. Bununla belə, fasiləyədək hesab açılmayıb.

2-ci yarıda “Real” təzyiqi artırıb. “Los blankos”un ardıcıl hücumları əsas vaxta artırılan dəqiqələrdə nəticə verib. Federiko Valverde qapını dəqiq nişan alıb. Bu qol yekunda Madrid nəhənginə qalibiyyət gətirib.

Xallarının sayını 69-a çatdıran “Real” hazırda 2-ci pillədə qərarlaşıb. “Kral klubu” lider “Barselona”dan 4 xal geri qalır.

Növbəti turda “Real” “Xetafe”nin qonağı olacaq. Bu qarşılaşma aprelin 23-də keçiriləcək. “Los blankos”un çempionluq yarışındakı rəqibi “Barselona” isə aprelin 22-də “Malyorka”nı qəbul edəcək.