"Sumqayıt" klubu "Fehervar"ı qəbul edib

26 iyul 2024

“Sumqayıt” klubu UEFA Konfrans liqasında ilk görüşünə çıxıb.

“Kimyaçılar” II təsnifat mərhələsi çərçivəsində Macarıstan təmsilçisi “Fehervar”la üz-üzə gəlib.

Mehdi Hüseynzadə adına Sumqayıt Şəhər Stadionunda keçirilən qarşılaşmada hesab 20-ci dəqiqədə açılıb. Meydan sahiblərinin heyətindən Səbuhi Abdullazadə fərqlənib.

32-ci dəqiqədə “Sumqayıt” azlıqda qalıb. Murad Xaçayev birbaşa qırmızı vərəqə ilə meydandan qovulub.

Macarlar 7 dəqiqə sonra tarazlığı bərpa etməyi bacarıblar. Tobias Kristensen hədəfi dəqiq nişan alıb. Tərəflər fasiləyə bərabərliklə yollanıblar.

“Fehervar” ikinci hissədə üstünlüyü ələ almağı bacarıb. Görüşdə son nöqtəni Çaba Şpandler qoyub. “Sumqayıt” – “Fehervar”: 1-2.

Qeyd edək ki, tərəflər arasında cavab matçı iyulun 31-i Macarıstanda keçiriləcək. Bu cütün qalibi III təsnifat mərhələsində Kiprin “Omoniya” və Gürcüstanın “Torpedo” klubları arasında mübarizədə güclü olan tərəflə qarşılaşacaq.

#Sumqayıt FK