"Sumqayıt" və "Neftçi" klublarının matçında 2 qol

“Neftçi” komandası Azərbaycan Premyer liqasında növbəti matçına çıxıb.

“Ağ-qaralar” 16-cı turda “Sumqayıt” kollektivi ilə üz-üzə gəlib.

Mehdi Hüseynzadə adına Sumqayıt Şəhər Stadionunda keçirilən qarşılaşmada azarkeşlər 2 qol görüblər.

Hesab 20-ci dəqiqədə açılıb. “Kimyaçılar”ın heyətində Kamran Quliyev hədəfi dəqiq nişan alıb. 43-cü dəqiqədə meydan sahibləri 2-ci topu paytaxt təmsilçisinin qapısına göndəriblər. Bu dəfə Cordan Rezabala fərqlənib. İlk hissə gənclik şəhəri təmsilçisinin üstünlüyü ilə yekunlaşıb.

“Neftçi” 2-ci yarıda məğlubiyyətdən xilas olmağa çalışsa da, hücumları nəticə verməyib. Sərfəli hesabı qoruyan “Sumqayıt” görüşü qalib tamamlayıb.

Bu nəticədən sonra “Neftçi”nin aktivində əvvəlki kimi 13 xal var. Paytaxt klubu hazırda 8-ci pillədə qərarlaşıb. Vaqif Cavadovun baş məşqçisi olduğu “Sumqayıt” isə 19 xalla 6-cıdır.

Qeyd edək ki, “Neftçi” növbəti turda “Kəpəz”lə qarşılaşacaq. Dekabrın 15-i “ağ-qaralar”ın meydanında keçiriləcək matç saat 18:30-da start götürəcək.