Qurban Qurbanovun yetirmələri "Ferentsvaroş"u məğlub etdi

"Qarabağ" klubu UEFA Çempionlar Liqasının pley-off mərhələsinin ilk oyununda "Ferentsvaroş"la qarşılaşıb.

Macarıstandakı "Qroupama Arena"da keçirilən görüşdə Ağdam təmsilçisi 3-1 hesablı qələbəyə sevinib.

Qarşılaşmada hesabı meydan sahibləri açıblar. 29-cu dəqiqədə Barnabas Varqa adını tabloya yazdırıb. Bu, ilk 45 dəqiqədə vurulan yeganə qol olub.

İkinci hissədə dönüş yaradan qonaqlar 50-ci dəqiqədə Marko Yankoviçlə bərabərliyi bərpa ediblər. Qoldan 17 dəqiqə sonra diqqət mərkəzinə düşən Kevin Medina komandasını hesabda irəli çıxarıb və nəhayət oyunun bitməsinə 5 dəqiqə qalmış rəqib qapısına yol tapan Musa Qurbanlı isə yekun hesabı müəyyənləşdirib. "Ferentsvaroş" ‒ "Qarabağ": 1-3.

Qeyd edək ki, komandalar arasında cavab oyunu avqustun 27-də Tofiq Bəhramov adına Respublika Stadionunda baş tutacaq.

Turu keçən tərəf UEFA Çempionlar Liqasının, məğlub olan isə Avropa Liqasının əsas mərhələsinə qatılacaq.