“Real” irqçiliyə məruz qalan Vinisiusa dəstək oldu

La liqada 36-cı turun “Real Madrid” - “Rayo Valyekano” matçı Vinisiusa dəstək aksiyası ilə əlamətdar olub.

Belə ki, “kral klubu”nun futbolçuları meydana braziliyalı forvardın adının yazıldığı forma ilə çıxıblar. Bundan başqa, azarkeşlər də Juniora dəstək nümayiş etdiriblər.

Qarşılaşmaya gəldikdə, oyun “Real”ın 2-1 hesablı qələbəsi ilə başa çatıb. “Los Blankos”dan Kərim Benzema və Rodriqo, “Rayo”dan isə Raul De Tomas fərqlənib. Bu nəticədən sonra 74 xalı olan “Real” 2-ci pillədə qərarlaşıb. Ardıcıl 3-cü oyunda uduzan “Rayo Valyekano” isə 46 xalla 11-cidir.

Turun digər qarşılaşmasında “Atletiko” Barselona səfərində sülh bağlayıb. “Espanyol”un qonağı olan Madrid klubu 3-0 hesabı ilə irəlidə olsa da, üstünlüyünü qoruya bilməyib. Montes, Xoselu və Vinisius Souzanın qolları meydan sahiblərini məğlubiyyətdən xilas edib. 3-3 hesabı ilə bitən görüşdən sonra “Atletiko” 73 xalla 3-cü, “Espanyol” isə 35 xalla 19-cu yerdədir.

Premyer liqada 32-ci turdan təxirə salınan oyun baş tutub. “Brayton” çempionluğu təmin edən “Mançester Siti” ilə üz-üzə gəlib. Matçda hesabı Fil Foden açsa da, “qağayılar” fasiləyədək tarazlığı bərpa ediblər. 1-1 hesabı ilə yekunlaşan qarşılaşmadan sonra 62 xalla 6-cı yerdə olan “Brayton” tarixində ilk dəfə avrokuboka vəsiqə qazanıb. Komanda növbəti mövsüm UEFA Avropa liqasında mübarizə aparacaq.