“Real Madrid” Arda Gülər üçün gələn təklifə cavab verib

10 dekabr 2024 273 baxış

“Real Madrid” Almaniya çempionu “Bayer Leverkuzen”in türkiyəli ulduz Arda Gülər üçün göndərdiyi təklifi cavablandırıb.

İspaniya mediasının əldə etdiyi məlumata görə, “kral klubu” A.Gülərin transferinə icazə verməyib.

“Real”ın yekun qərarında baş məşqçi Karlo Ançelottinin rəyi əsas rol oynayıb.

Məsələ ilə əlaqədar açıqlama verən italiyalı mütəxəssis həm Ardanın, həm də heyətə nadir hallarda düşən hücumçu Endrikin komanda üçün vacib olduğunu bildirib. O, gənc futbolçuların səbrli olmasının önəmli olduğunu vurğulayıb.

Qeyd edək ki, ötən ilin yayında 20 milyon avroya “Fənərbağça”dan transfer olunan Arda cari mövsümdə 17 görüşdə iştirak edib. Bu mövsüm ilk qolunu La Liqanın son turunda “Jirona” ilə matçda vuran türkiyəli yarımmüdafiəçi ümumən klub forması ilə 29 oyunda 7 qolla yadda qalıb. Müqaviləsi 2029-cu ilədək olan A.Gülər “los blankos”la İspaniya çempionatı və superkuboku, Çempionlar liqası və UEFA superkubokunda qalib gəlib.

#Real Madrid FK