“Real Madrid” və “Atletiko” “Çelsi”nin ulduzu üçün mübarizə aparır

Argentina millisi ilə 2022-ci il dünya çempionatının qalibi, “Çelsi”nin liderlərindən Entso Fernandes La Liqada çıxış etməyə hazırlaşır.

24 yaşlı yarımmüdafiəçi Madrid nəhəngləri ‒ “Real” və “Atletiko”nun transfer hədəfidir.

İddia olunur ki, bu yay Entsonu heyətə qatmağa çalışan klublar artıq oyunçunun nümayəndələri ilə danışıqlara başlayıblar. Məlumata görə, Fernandes özü də İspaniya çempionatında çıxış etməyə müsbət yanaşır.

Keçidə mane ola biləcək əsas amil futbolçunun yüksək dəyəridir. “Transfermarkt” portalının 75 milyon avro məbləğində dəyərləndirdiyi Entso üçün “Çelsi” 2023-cü ildə 121 milyon avro ödəyib. Bu səbəbdən “zadəganlar” onun gedişindən də yüksək gəlir etmək niyyətindədir.

Qeyd edək ki, London klubunun aparıcı oyunçularından olan Fernandes indiyədək 97 matça qatılıb. 12 qol və 14 assistlə yadda qalan argentinalı daha əvvəl ölkəsinin “River Pleyt” və Portuqaliyanın “Benfika” klublarında top qovub.