“Real Madrid” yayda bu futbolçularla güclənəcək

“Real Madrid” yay transfer pəncərəsində heyətdə bir sıra dəyişikliklər edəcək.

Klub müqaviləsi iyunda başa çatacaq Luka Modriç, Lukas Vaskes və Xesus Valyexoya yeni sözləşmə təklif etməyəcək. Bundan başqa, zədəyə meyilli David Alaba, eləcə də Dani Sebalyosun gələcəyi sual altındadır.

“Los blankos” bu futbolçuların yerinə yeni transferlər planlaşdırır. Madrid nəhənginə qoşulmağa əsas namizədlər Trent Aleksander-Arnold, Vilyam Saliba və Bruno Gimaraişdir.

Trenti azad agent kimi Vaskesin yerinə gətirməyi planlaşdıran “Real” Saliba və Gimaraişlə müvafiq olaraq müdafiə və yarımmüdafiə xəttini gücləndirmək istəyir.

İddia olunur ki, Aleksander-Arnold İspaniya çempionu ilə artıq şəxsi razılıq əldə edib. Saliba və Gimaraişin keçidinə isə onların yüksək dəyəri mane ola bilər. “Transfermarkt” portalı həm Vilyamı, həm də Brunonu 80 milyon avro məbləğində dəyərləndirir.

Bu futbolçularına gəlişinə Vinisius Juniorun “Real”dan gedişi kömək edə bilər. Braziliyalı vinger uzun müddətdir Səudiyyə Ərəbistanı klublarının diqqət mərkəzindədir. Bəzi mənbələrə görə, ərəblər Vini üçün 300 milyon avro ödəməyə hazırdır.