“Real Madrid”in ulduzu Arda Gülər yenə diqqət mərkəzində

“Real Madrid”in İspaniya kubokunun finalına adlaması ilə əlamətdar olan gecə türkiyəli futbolçu Arda Gülər üçün də yaddaqalan alınıb.

“Real Sosyedad”la matça əlavə vaxtın 16-cı dəqiqəsində daxil olan və cəmi bir neçə dəqiqə meydanda olan Arda öz çıxışı ilə növbəti dəfə hərkəsin rəğbətini qazanıb. 20 yaşlı yarımmüdafiəçi komandasının yekun uğurunda da önəmli rol oynayıb.

Məhz A.Gülərin künc nöqtəsindən etdiyi ötürmədən sonra Antonio Rüdiger topu qapıya göndərərək “Real”ın mərhələ adlamasına kömək edib. Bununla da Arda cari mövsümdə assistlərinin sayını 7-yə çatdırıb. Ümumilikdə 32 görüşə qatılan futbolçu həm də 3 qolun müəllifidir.

Qeyd edək ki, ötən mövsümlə müqayisədə daha az meydana çıxan Ardanın “Real”dan ayrılacağı tez-tez gündəmə gətirilir. İddia olunur ki, oyunçunun qərarına baş məşqçi Karlo Ançelottinin klubdan gedişi təsir edə bilər. Belə olan halda, A.Gülər komandada qalmağı hədəfləyir. Əks təqdirdə isə icarə əsasında başqa kollektivlərə qoşulmaq imkanını nəzərdən keçirəcək.