Sərbəst güləş millimiz tarix yazdı

Bakıda keçirilən güləş üzrə Avropa Olimpiya Təsnifat turnirinə yekun vurulub.

Milli Gimnastika Arenasında təşkil olunan yarışın son günü sərbəst güləş millimiz üçün uğurlu alınıb.

Pəhləvanlarımızdan 57 kq çəkidə yarışan Əliabbas Rzazadə ardıcıl olaraq İtaliya, Türkiyə və Şimali Makedoniya təmsilçilərinə qalib gələrək Olimpiadaya vəsiqə qazanıb.

Titullu güləşçilərimizdən, 65 kq-da çıxış edən Hacı Əliyev əvvəlcə Fransa, növbəti mərhələlərdə isə Rusiya və Albaniya idmançılarını məğlub edərək ardıcıl 3-cü dəfə Olimpiadaya vəsiqə əldə edib. 74 kq çəki dərəcəsində yer alan Turan Bayramov da Fransanın paytaxtında keçiriləcək turnirdə iştirak edəcək. O, bu uğura İsveçrə, Rumıniya və İtaliya güləşçilərinə qalib gəlməklə nail olub.

Bundan başqa, daha 2 pəhləvanımız – Osman Nurmaqomedov 86, Georgi Meşvildişvili isə 125 kq çəkidə Yay Olimpiya oyunlarına lisenziya əldə ediblər.

Beləliklə, Avropa Olimpiya Təsnifat turnirində mübarizə aparan sərbəst güləş millimizin 5 üzvü də “Paris-2024”ə qatılmaq hüququ qazanıb.

Qeyd edək ki, 3 gün davam edən Olimpiya Təsnifat turnirində 33 ölkədən ümumilikdə 297 idmançı mübarizə aparıb.