UEFA Çempionlar Liqasında 2-ci turun görüşləri keçirilir

UEFA Çempionlar liqasında 2-ci turun matçları keçirilir.

Mərkəzi qarşılaşmalardan biri Londonda “Arsenal” və “Pari Sen-Jermen” arasında olub. “Emireyts” arenasında təşkil olunan görüş meydan sahiblərinin 2-0 hesablı qələbəsi ilə yekunlaşıb. Komandanın qolları Kay Haverts və Bukayo Sakanın aktivindədir.

Daha bir diqqət çəkən oyunda Leverkuzen “Bayer”i “Milan”ı qəbul edib. Matçda yeganə qol 2-ci yarının əvvəlində vurulub. Viktor Bonifeysin dəqiq zərbəsi Almaniya çempionuna 3 xal qazandırıb.

İlk turda “Monako”ya məğlub olan “Barselona” bu dəfə doğma meydanda İsveçrə təmsilçisi “Yanq Boyz”a 5-0 hesabı ilə qalib gəlib. “Blauqrana”nın heyətində dubl edən Robert Levandovski ilə yanaşı, Rafinya və İnyiqo Martines fərqləniblər. Daha bir epizodda rəqibin üzvü Mohamed Kamara avtoqol müəllifi olub.

2023-cü ilin çempionu “Mançester Siti” də turu 3 xalla başa vurub. Slovakiyanın paytaxtı Bratislavada “Slovan”ın qonağı olan “şəhərlilər” 4-0 hesablı qələbə qazanıblar. İngiltərə nəhənginin qolları İlkay Gündoğan, Fil Foden, Erlinq Holand və Ceyms Makatinin aktivindədir.

Eyni nəticə İtaliya çempionu “İnter” və Serbiyanın “Srvena Zvezda” klubu arasında görüşdə qeydə alınıb. “Cuzeppe Meatsa” arenasında keçirilən matçda “neradzurri”nin qollarını Hakan Çalhanoğlu, Marko Arnautoviç, Lautaro Martinez və Mehdi Taremi vurublar.

Gecənin ən bol qollu oyunu Dortmundda olub. Şotlandiyanın “Seltik” komandasını qəbul edən “Borussiya” 7-1 hesabı ilə qalib gəlib. “Sarı-qaralar”ın heyətində Kərim Adeyemi het-trik, Seru Qirassi isə dublla diqqət çəkib. Daha iki epizodda Emre Can və Feliks Nmeçanın zərbəsi dəqiq olub.