UEFA Super kuboku “Mançester Siti” - “Sevilya” matçı

Çempionlar liqasının son qalibi “Mançester Siti” klubu UEFA Super kubokunun sahibi olub.

Baş məşqçi Xosep Quardiolanın futbolçuları mükafat uğrunda matçda Avropa liqasının qalibi “Sevilya” ilə üz-üzə gəliblər.

Yunanıstanın Pirey şəhərinin “Georgios Karaiskakis” stadionunda keçirilən görüşdə hesabı İspaniya təmsilçisi açıb. 25-ci dəqiqədə Yusuf En-Nesiri “roxiblankos”u irəli çıxarıb. İlk hissə “Sevilya”nın minimal üstünlüyü ilə yekunlaşıb.

Fasilədən sonra hücumlarını sürətləndirən “Siti” 63-cü dəqiqədə Koul Palmerin qolu ilə tarazlığı bərpa edib. 1-1.

Qalan vaxtda hesab dəyişmədiyindən penaltilər seriyasına müraciət olunub. Burada isə “şəhərlilər” 11 metrlik zərbələri daha dəqiq yerinə yetiriblər. Beləliklə, “Mançester Siti” tarixində ilk dəfə UEFA Super kubokunda qələbə qazanıb.

Komandanın baş məşqçisi Xosep Quardiola isə unikal nailiyyətə imza atıb. Daha əvvəl “Barselona” və “Bavariya” ilə mükafata yiyələnən Quardiola 3 fərqli klubla bu uğura imza atan ilk mütəxəssis olub.