UEFA Superkuboku ilə bağlı qərar verildi

Futbol üzrə UEFA Superkuboku uğrunda növbəti matçın məkanı müəyyənləşib.

UEFA-nın yaydığı rəsmi məlumata əsasən, qarşılaşma İtaliyanın Udine şəhərində keçiriləcək. “Friuli” stadionunun ev sahibliyi edəcəyi görüş gələn il avqustun 13-də təşkil olunacaq.

Qeyd edək ki, UEFA Superkuboku uğrunda oyunda Çempionlar liqasını və Avropa liqasını qazanan komandalar üz-üzə gəlir. Bu mükafatın son qalibi Madrid “Real”ıdır. “Kral klubu” bu il avqustun 14-ü Varşavada keçirilən matçda “Atalanta”nı 3-0 hesabı ilə məğlub edib. Bu qələbə sayəsində 6-cı dəfə mükafata yiyələnən “los blankos” həm də superkuboku ən çox qazanan kollektiv olub. İspaniya nəhəngi daha əvvəl 2002, 2014, 2016, 2017 və 2022-ci illərdə superkubokda qalib gəlib. Qələbələrin sayına görə 2-ci pilləni isə “Barselona” və “Milan” bölüşürlər. Həm “blauqrana”, həm də “rossoneri” 5 dəfə mükafatın sahibi olub.