Vinisius Junior "Real"dan ayrılacaq?

Bir neçə gün əvvəl İspaniya superkubokunun finalında “Barselona” ilə matçda het-trik edərək, “Real”ın zəfərində əsas pay sahibi olan Vinisius Junior klubdan gedə bilər.

Xarici mediada yayılan məlumata görə, 23 yaşlı forvard "Mançester Yunayted"in transfer hədəfidir. Bildirilir ki, "Real" yayda Kilian Mbappeni heyətə qatacağı təqdirdə "qırmızı şeytanlar" Vinisius üçün hərəkətə keçəcək.

İddia edilir ki, mankunianlar gənc hücumçu üçün 150 milyon avroluq təklif etməyə hazırdır. Lakin “kral klubu”nun Junioru komandada saxlayacağı ehtimal olunur.

Qeyd edək ki, “Flamenqo”nun yetirməsi olan Vinisius 2018-ci ildən “Real Madrid”də forma geyinir. Müqaviləsi 2027-ci ilə qədər olan və 241 matçda 68 qol vuran braziliyalı “los blankos”la 2 dəfə La liqanın qalibi olub. Bundan başqa, Vinisius Madrid komandası ilə Çempionlar Liqası, UEFA superkuboku və İspaniya superkubokunda qələbə qazanıb.