WAKO Dünya Kubokunu 11-ci dəfə qazanan Eduard Məmmədov vətənə dönüb

Karyerasında 11-ci dəfə WAKO versiyası üzrə Dünya Kubokunu qazanan Azərbaycan Respublikası Daxili İşlər Nazirliyinin İdman Cəmiyyətinin İdman-təlim şöbəsinin rəisi, polis polkovnik-leytenantı Eduard Məmmədov Vətənə dönüb.

Türkiyədə keçirilən yarışda tarixi uğura imza atan titullu idmançı təəssüratlarını bölüşüb:

“İstanbulda keçirilən turnirə həm idmançı, həm də məşqçi kimi qatılmışdım. İki versiyada vuruşdum, öz rekordumu yenilədim. Bir gün ərzində beş döyüş keçirdim. Güclü idmançılarla qarşılaşdım. Bir məqsədim var idi, Vətənə qızıl medalla qayıtmaq. Şükürlər olsun ki, yaxşı nəticə əldə etdik”.

İstanbul şəhərində keçirilən yarışda Eduard Məmmədovun tələbələri də uğurla çıxış ediblər. 63 kq çəki dərəcəsində mübarizə aparan Rəvan Əhmədov gümüş, Amin Quliyev isə bürünc medalın sahibi olub.

Qeyd edək ki, Eduard Məmmədov İstanbulda keçirilən turnirdə “Master klass” kateqoriyası üzrə 63 kq çəkidə mübarizə aparıb. "Layt kontakt” və “Kik Layt” versiyalarında 5 döyüş keçirərək 2 qızıl medal qazanan təcrübəli idmançı finalda isveçli Ola Alvarssonu məğlub edib.