Xabi Alonso “Bayer Leverkuzen”dən getməyə yaxındır

“Bayer”də gördüyü işlərlə futbol ictimaiyyətinin diqqətini cəlb edən Xabi Alonso vaxtilə futbolçu kimi çıxış etdiyi “Liverpul” və “Bavariya” klublarının maraq dairəsindədir.

Belə ki, Yurgen Kloppun mövsümün sonunda gedəcəyini elan etdikdən sonra “Liverpul” rəhbərliyi yeni çalışdırıcı axtarışına başlayıb.

“Bavariya”ya gəldikdə isə Münhen təmsilçisi Tomas Tuxeli hələ ki, istefaya göndərməsə də, komandanın zəif nəticələri idarə heyətini yeni baş məşqçi axtarışına sövq edib.

Mediada yayılan məlumata görə, “Bayer” müqaviləsi 2026-cı ilədək olan Xabi Alonsonu kollektivdə saxlamaq üçün onu dəvət etmək istəyən klublardan azı 24 milyon avro tələb edir.

Qeyd edək ki, 2022-ci ilin oktyabrından “Bayer”in sükanı arxasında olan Xabinin rəhbərliyi ilə Leverkuzen komandası cari mövsümdə çempionluğa əsas namizəddir. 24 turdan sonra 64 xal toplayan kollektiv ən yaxın izləyicisi “Bavariya”nı 10 xal qabaqlayır.

Almaniya Kubokunda da favorit olan “Bayer” Avropa Liqasında da yoluna davam edir. X.Alonsonun futbolçuları 1/8 final mərhələsində Azərbaycan çempionu “Qarabağ”la qarşılaşacaq.