Azərbaycan bərpa olunan enerji mənbələri ilə bağlı hansı addımları atdı? | Detallar açıqlandı

Azərbaycan hökuməti ilə Dünya Bankı arasında “Azərbaycanda bərpa olunan enerji mənbələrindən istifadənin genişləndirilməsi layihəsi” çərçivəsində kredit sazişi imzalanıb.

Məbləği 173,5 milyon ABŞ dolları olan kredit müqaviləsini “AzərEnerji” İdarə Heyətinin sədri Baba Rzayev və Dünya Bankının Azərbaycan üzrə ölkə meneceri Ştefani Ştаlmaister imzalayıblar. Zəmanət sazişinə isə Azərbaycan hökuməti adından maliyyə naziri Sahil Babayev və Ştefani Ştаlmaister imza atıblar.

Kredit vəsaiti Azərbaycanda tikilməkdə olan bərpa olunan enerji mənbələri üzrə stansiyalardan alınan enerjinin milli enerji sisteminə təhlükəsiz və dayanıqlı inteqrasiyasını təmin etmək məqsədilə enerji ötürücü infrastrukturun gücləndirilməsinə yönəldiləcək.

Kredit 5 il güzəşt müddəti olmaqla 15 illik şərtlərlə ayrılıb və 2039-cu ilin sonunda tam qaytarılması nəzərdə tutulur. Layihədə Azərbaycan hökumətinin iştirak payı 31,2 milyon ABŞ dolları təşkil edir ki, bu məbləğ əsasən ƏDV və gömrük rüsumlarının ödənilməsinə yönəldiləcək.

Dünya Bankının maliyyələşdirəcəyi komponentlərə 341 kilometr uzunluğunda 500 və 330 kilovoltluq dörd yeni elektrik verilişi xəttinin inşası, eləcə də 500/330/10 kilovoltluq “Nəvahi” yarımstansiyası üçün transformator və əlaqəli avadanlıqların alınması daxildir.