Azərbaycanda mühüm layihə | Bərpaolunan enerjinin payı nə qədər olacaq?

“Azərbaycan bərpa olunan enerji mənbələri üzrə yüksək potensiala malik ölkələrdəndir”.

Bunu Bakıda İqtisadiyyat, Ekologiya və Təbii Sərvətlər Nazirliklərinin dəstəyi, Kiçik və Orta Biznesin İnkişafı Agentliyinin (KOBİA) təşkilatçılığı ilə keçirilən “Yaşıl iqtisadiyyatda kiçik və orta biznesin rolu” mövzusunda konfransda iqtisadiyyat naziri Mikayıl Cabbarov bildirib.

“Bu potensialdan istifadə istiqamətində dünyanın aparıcı enerji şirkətləri ilə dövlət-özəl sektor tərəfdaşlığı çərçivəsində mühüm layihələr həyata keçirilir. Bütün bunlar 2030-cu ilə qədər ölkənin ümumi enerji balansında bərpa olunan enerji üzrə qoyuluş gücü payının 30 %-ə çatdırılması hədəfinə nail olunmasına istiqamətlənib”, – deyə o qeyd edib.

M.Cabbarov bildirib ki, hökumət Qarabağda bizneslərin inkişafının stimullaşdırılması üçün təşviq mexanizmləri, güzəştlər, stimullaşdırıcı tədbirlər təqdim edir:

“Yaşıl enerji” zonası elan olunan bölgələrdə bir sıra layihələr davam etdirilir. Bu ərazilər yüksək potensiallı “yaşıl enerji” mənbələrinə malikdir. Füzuli, Cəbrayıl, Zəngilan rayonlarında günəş enerjisi potensialı, Laçın və Kəlbəcər rayonlarında külək və su elektrik enerjisi potensialı yüksək qiymətləndirilir”