Azərbaycanın hasilat potensialı artacaq

“Abşeron” qaz-kondensat yatağının işlənilməsi Azərbaycanın hasilat potensialını artıracaq.

Dövlət Neft Şirkətindən verilən məlumata görə, bu barədə avqustun 31-də SOCAR-ın prezidenti Rövşən Nəcəfin Əbu-Dabi Milli Neft Şirkətinin aşağı karbon həlləri və beynəlxalq inkişaf üzrə icraçı direktoru Musabbeh Al Kaabi ilə keçirilən görüşdə bildirilib.

Söhbət zamanı ölkələr arasında qarşılıqlı əməkdaşlıq əlaqələrinin uğurla inkişaf etdiyi qeyd olunub. Ölkəmizdə enerji sektorunda həyata keçirilən layihələrdə Birləşmiş Ərəb Əmirliklərinin şirkətlərinin iştirakının əhəmiyyəti vurğulanıb.

Cari ilin avqustunda SOCAR, Fransanın “TotalEnergies” və BƏƏ-nin ADNOC şirkətləri arasında imzalanan sazişin Azərbaycan və BƏƏ arasında strateji əlaqələrin daha da gücləndirilməsinə dəyərli töhfə verəcəyi bildirilib. Görüşdə həmçinin “Abşeron” layihəsinin cari vəziyyəti müzakirə edilib, qarşılıqlı maraq doğuran digər məsələlər ətrafında fikir mübadiləsi aparılıb.