Bu sahədə ciddi yeniliklər olacaq | Yeni yaradılan agentlikdən gözləntilər
Prezident İlham Əliyevin avqustun 27-də “Antiinhisar və istehlak bazarına nəzarət sahələrində idarəetmənin təkmilləşdirilməsi ilə bağlı əlavə tədbirlər haqqında” imzaladığı Fərman bu sahədə ciddi yeniliklər vəd edir.
Sənədə görə, əvvəllər İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidməti indi Prezidentin birbaşa nəzarətində olacaq.
Qeyd edilib ki, Agentlik antiinhisar, haqsız rəqabət, istehlakçıların hüquqlarının müdafiəsi və digər istiqamətlərdə dövlət nəzarətini və tənzimləməsini həyata keçirən mərkəzi icra hakimiyyəti orqanıdır.
Bəs bu sahədə islahatlar hansı zərurətdən irəli gəlir və nəticələri necə olacaq?
Keçmiş maliyyə naziri Fikrət Yusifovun sözlərinə görə, Antiinhisar və İstehlak Bazarına Nəzarət Dövlət Agentliyinin yaranması Rəqabət Məcəlləsinin qəbulundan sonra zəruri xarakter daşıyırdı:
“Buna qədər bu qurum İqtisadiyyat Nazirliyinin nəzdində fəaliyyət göstərirdi. Ancaq Rəqabət Məcəlləsinin qəbulu ilə bu sahədə işlərin gücləndirilməsi, fəaliyyətin səmərəliliyinin artırılması nöqteyi nəzərindən sözügedən qurumun daha çevik fəaliyyəti üçün müstəqil olması zərurəti var idi.
Hesab edirəm ki, belə bir müstəqil qurumun yaradılması istehlak bazarlarında rəqabətin normal səviyyədə tənzimlənməsinə xidmət edəcək. Qurum qarşısında ciddi vəzifələr qoyulur. Düşünürəm ki, biz nəticələri hasil edə biləcəyik”.
![icon](/images/loading.png)