Çay və qəhvənin qiymətində artım ola bilər

Azərbaycanda çay və qəhvənin qiymətlərində bahalaşma ola bilər.

Dünya bazarlarında çay və qəhvənin qiymətlərinin yüksələcəyi, bununla bağlı qlobal şirkətlərin müvafiq addımlar atmağa hazırlaşdığı haqqında proqnozlar gündəmə gəlib.

Xarici mediada yayılan xəbərlərə görə, həmin məhsulların bahalaşmasının səbəbləri 2023-cü ilin əvvəlindən dünya xammal bazarında qiymətlərin təxminən 20%-ə yaxın artması, Asiya ölkələrindəki quraqlıq, istehsalçılar tərəfindən pərakəndə satıcılara endirimlərin kəskin şəkildə azalmasıdır.

Bəs maraqlıdır, çay və qəhvənin qiymətlərinin artması Azərbaycan bazarına təsir edəcək?

İqtisadçı-ekspertlər düşünür ki, bütün ərzaq və qida məhsullarının bahalaşması fonunda qəhvə və çayın qiymətində artımlar labüddür. Sadəcə elə məhsullar var ki, onlar bu və ya digər səbəblərdən orta statistik inflyasiya göstəricisindən daha yuxarı olur.

Hazırda çay və qəhvədə də eyni vəziyyət müşahidə edilir. Çünki istehsalçı olan ölkələrdə iqlim normalarının pozulması nəticəsində müəyyən quraqlığın olması bu məhsulların istehsal həcmlərinə ciddi təsir göstərir. İstehsal həcminin azalması təklifin azalmasına gətirib çıxarır və qiymət artımını qaçılmaz edir.