COP29 çərçivəsində KOB-lar birgə əməkdaşlığa qərar verdi

Bakıda keçirilən BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası çərçivəsində kiçik və orta bizneslərin yaşıl keçidinə təşviq və bu sahədə əməkdaşlığa dair sənədlər imzalanıb.

Mavi Zonada təşkil olunan imzalanma mərasimində “KOB-ların yaşıl iqlim keçidi üçün Bakı Koalisiyası Bəyannaməsi” beynəlxalq qurum və təşkilatlara açıq elan edilib.

Sənədi Kiçik və Orta Biznesin İnkişafı Agentliyi, Beynəlxalq Ticarət Mərkəzi, Braziliyanın Mikro və Kiçik Müəssisələrə Dəstək Xidməti imzalayıb.

Qeyd edək ki, KOBİA-nın təşəbbüsü ilə hazırlanan “KOB-ların yaşıl iqlim keçidi üçün Bakı Koalisiyası Bəyannaməsi” qlobal səviyyədə bu sahədə yaşıl iqtisadiyyata keçid üzrə birgə səylərin birləşdirilməsi və əməkdaşlığın qurulması məqsədini daşıyır.