Dünya İqtisadi Forumunun saytında Rövşən Nəcəfin məqaləsi dərc olunub - Baku TV

SOCAR-ın prezidenti Rövşən Nəcəfin Dünya İqtisadi Forumunun saytında məqaləsi dərc olunub.

Məqalədə bildirilib ki, Azərbaycan fəal şəkildə 3 böyük "yaşıl enerji" dəhlizi formalaşdırır. Bunlar Xəzər dənizi-Qara dəniz-Avropa, Azərbaycan-Türkiyə-Avropa və Mərkəzi Asiya-Azərbaycan-Avropa dəhlizləridir.

Rövşən Nəcəf məqaləsində qeyd edib ki, 2022-ci ildə Buxarestdə Azərbaycan, Gürcüstan, Rumıniya və Macarıstan arasında "yaşıl enerji"nin inkişafı və ötürülməsi sahəsində strateji tərəfdaşlığa dair Sazişin imzalanması Avropaya "yaşıl enerji" dəhlizinin formalaşdırılması istiqamətində atılan mühüm addım olub.

Müəllif vurğulayıb ki, enerji keçidinə dair milli strategiyalar dekarbonizasiya sahəsində regional faydalar gətirə bilər. Strateji coğrafi mövqeyi, mövcud infrastrukturu və inkişaf etmiş enerji tərəfdaşlıqları nəzərə alınmaqla Azərbaycan Xəzər regionu, Mərkəzi Asiya və Avropa arasında əlaqələndirici həlqə olmağa imkan verən unikal mövqeyə malikdir.