Əhalinin batmış kapitalı necə ödəniləcək? - Pensiya məbləği azaldılacaq?

Hesablama Palatası Dövlət Sosial Müdafiə Fondunun auditi zamanı 117 milyon manatdan çox məcburi dövlət sosial sığorta haqqının vətəndaşların fərdi hesablarında əks olunmadığını müəyyən edib.

2006-2016-cı illər üzrə yaranmış qalıqlar əsasən sığorta edənlərin təqdim etdiyi B3 formalarında sosial sığorta nömrəsinin qeyd olunmaması və ya ümumiyyətlə hesabatın təqdim edilməməsi ilə bağlı olub.

2017-ci ildən sonra isə əsas problem hesbatların ümumiyyətlə təqdim olunmamasıdır.

“Yeni sistemə keçid zamanı şirkətlər Dövlət Sosial Müdafiə Fonduna ödənilmiş məbləğləri işçilərin hesabında düzgün əks etdirməyiblər. Bu, verilməyəcək 117 milyonluq pensiya deməkdir”, – iqtisadçı Xalid Kərimli məsələyə münasibət bildirərkən deyib.

Onun sözlərinə görə, şirkətlərin VÖEN ilə işçi işlətməsi qanunsuzdur.

Hüquqşünas Hikmət Əliyev isə bildirib ki, bu yolla onlar əmək münasibətlərini gizlətməyə çalışırlar.