"Əsrin müqaviləsi" Azərbaycanın enerji strategiyasının əsasını formalaşdırdı - Baku TV

20 sentyabr Azərbaycanda Dövlət Suverenliyi Günü ilə yanaşı, həmçinin Neftçilər Günü kimi qeyd edilir.

Bu tarixin seçilməsi isə təsadüfi xarakter daşımır. Belə ki, 32 il öncə məhz sentyabrın 20-də Dövlət Neft Şirkəti ilə dünyanın aparıcı neft şirkətləri arasında Xəzər dənizinin Azərbaycan sektorunda yerləşən “Azəri”, “Çıraq” və “Günəşli” neft yataqlarının istismar olunmasına dair hasilatın pay bölgüsü sazişi imzalanıb.

Sonradan əhəmiyyətinə görə “Əsrin müqaviləsi” adlandırılan sənəd həmin dövrdə ölkəyə 7,4 milyard dollar investisiya qoyulmasını nəzərdə tuturdu. Azərbaycanın bu layihədən 34 milyard dollar mənfəət əldə etməsi gözlənilirdi. Lakin ötən müddətdə “qara qızıl”ın bahalaşması Azərbaycanın əldə etdiyi mənfəətin nəzərdə tutulandan dəfələrlə çox olmasına imkan yaratdı. Nəticədə, bu müqavilə Azərbaycanın müstəqillik dövrünün iqtisadi tarixində yeni səhifə açaraq ölkənin hərtərəfli inkişafına və xalqın rifahının yüksəlməsinə gətirib çıxardı.

“Əsrin müqaviləsi”nin müddəti 2024-cü ilin sonunda başa çatmalı idi. Amma ölkədə həyata keçirilən daha bir uzaqgörən siyasətin nəticəsi kimi müqavilənin müddətinin bitməsinə yeddi il qalmış uzadıldı. Beləliklə, 14 sentyabr 2017-ci ildə imzalanan yeni sazişlə Azərbaycanın “Çıraq-Günəşli” yataqlar blokunun işlənilməsinin müddəti 2050-ci ilə qədər artırıldı.

“Əsrin müqaviləsi” həmçinin enerjinin digər seqmentlərində də böyük imkanlar yaradıb. Azərbaycan neftlə yanaşı, təbii qaz ixrac edən ölkəyə çevrilib. Eyni zamanda bərpa olunan enerji potensialının reallaşdırılması da ölkəmizin yaxın perspektivdə prioritetlərindəndir.