İqtisadiyyat naziri və SOCAR-ın prezidenti neftçilərə yeni mənzillər təqdim etdi

Uzun müddətdir neft sənayesində çalışan əməkdaşlara yeni mənzillər verilib.

Bu məqsədlə SOCAR-ın “Neftçi” mənzil-tikinti kooperativi tərəfindən inşa olunan yaşayış kompleksində tədbir keçirilib.

Tədbirdə iştirak edən iqtisadiyyat naziri, SOCAR-ın Müşahidə Şurasının sədri Mikayıl Cabbarov, SOCAR-ın prezidenti Rövşən Nəcəf və Müşahidə Şurasının üzvləri görülən işlərlə tanış olublar.

Həmçinin Müşahidə Şurasının üzvləri və sakinlər arasında keçirilən görüşdə neft-qaz sənayesi işçilərinin sosial təminatı və mənzil-məişət şəraitinin yaxşılaşdırılmasının daim diqqət mərkəzində saxlanıldığı vurğulanıb.

Tədbirdə evlərin sənədləri sahiblərinə təqdim edilib. Yeni ev sahibi olan əməkdaşlar göstərilən diqqətə görə təşəkkür ediblər.

Qeyd edək ki, Bakının Bibiheybət qəsəbəsində yerləşən yaşayış kompleksində tikinti işlərinə 2020-ci ildə başlanılıb. Yaşayış kompleksində ümumilikdə 676 mənzildən ibarət səkkiz binanın inşası nəzərdə tutulub.

2023-cü ildə inşası tamamlanmış 17 mərtəbəli iki binada birotaqlı, ikiotaqlı və üçotaqlı olmaqla ümumilikdə 252 mənzil var. Mənzillər tam təmir olunub, kommunal xidmətlərlə təchiz edilib. Yeni mənzil sahibləri arasında Birinci və İkinci Qarabağ müharibələrində iştirak etmiş SOCAR əməkdaşları da var.