İsrailin yeni səfiri SOCAR-la əməkdaşlıq barədə nələri açıqladı?

Azərbaycan-İsrail Hökumətlərarası Komissiyasının növbəti iclası yaxın vaxtlarda keçirilə bilər.

Bu barədə "Report"a müsahibəsində İsrailin Azərbaycandakı səfiri Ronen Kraus bildirib.

Onun sözlərinə görə, Hökumətlərarası Komissiya iqtisadi əməkdaşlığın ən vacib mexanizmidir.

O, nümunələrdən biri kimi Azərbaycan Dövlət Neft Şirkəti (SOCAR) ilə İsrail arasında İsraildəki "Tamar" qaz yatağının işlənməsi layihəsində 10% payın alınması haqqında sazişi qeyd edib. Səfir bu layihəni yüksək qiymətləndirib və onun iki ölkə arasında qarşılıqlı faydalı əməkdaşlığa böyük töhfə verdiyini bildirib.

Səfir həmçinin iki ölkənin "yaşıl enerji" məsələlərində əməkdaşlığının mühüm rolunu qeyd edib. Onun sözlərinə görə, İsrail günəş enerjisi sahəsində texnologiyalara malikdir.

Diplomat bildirib ki, ölkə öz təcrübəsini bölüşməyə və azərbaycanlı tərəfdaşlarla əməkdaşlıq imkanlarını araşdırmağa şad olacaq.