Macarıstan şirkətlərinin və beynəlxalq təşkilat nümayəndələrinin “Neft Daşları”na səfəri - Baku TV

Macarıstanın “MVM Upstream Private Limited Company” şirkətinin Azərbaycan üzrə baş icraçı direktoru Jozsef Qoldfarb, “MOL Azerbaijan”ın icraçı direktoru Attila Somfai və “Women in Energy Association” beynəlxalq təşkilatının nümayəndələrinin iştirakı ilə “Neft Daşları”na səfər təşkil olunub.

Əvvəlcə ümummilli lider Heydər Əliyevin abidəsi ziyarət olunub, önünə gül dəstələri qoyulub. Daha sonra ulu öndərin adını daşıyan muzeylə tanış olan nümayəndə heyətinə ümummilli liderin neft sənayesinin inkişafına göstərdiyi diqqət və qayğısını əks etdirən tarixi fotolar haqqında məlumat verilib.

Səfər çərçivəsində görkəmli neftçi-geoloq Ağaqurban Əliyevin abidəsi, Xəzəri fəth edərkən dənizdə həlak olan neftçilərin xatirəsinə ucaldılan abidə kompleksi və ölkəmizin ərazi bütövlüyü uğrunda qəhrəmancasına şəhid olan neftçilərin abidə kompleksini ziyarət edən nümayəndə heyəti şəhidlərimizin əziz xatirəsini ehtiramla anıb, “Neft Daşları”nın 30 illiyi münasibətilə ucaldılan kompozisiya ilə tanış olublar.

Nümayəndə heyəti “Neft Daşları”nın keçmiş və hazırkı dövrünü əks etdirən fotostendlə tanış olublar və onlara dünyada açıq dənizdə sənaye üsulu ilə qazılan ilk neft quyusu, onun tarixi və istismar dövrü haqqında məlumat verilib.

Qonaqlar həmçinin Xəzərdə ilk insansız platforma olan “Abşeron” İlkin Hasilat Sxeminin “Neft Daşları”ndakı Mərkəzi İdarəetmə otağında olub, 418 saylı estakadayanı meydançanı ziyarət ediblər.