Maliyyə Nazirliyi büdcə proqnozlarını açıqladı

Maliyyə Nazirliyinin 2026-cı ilin icmal və dövlət büdcələrinin ilkin göstəricilərinə görə, növbəti il dövlət büdcəsinin gəlirlərinin 38 milyard 423 milyon manat, xərclərinin isə 41 milyard 548,6 milyon manat olacağı proqnozlaşdırılır.

Yəni büdcə gəlirlərinin 2025-ci il proqnozları ilə müqayisədə 0,2, büdcə xərclərinin isə 0,3 faiz artacağı gözlənilir. Müdafiə və təhlükəsizlik xərcləri 4 faizə yaxın, vergi orqanlarının büdcə öhdəliyi 9 faizə, gömrük orqanlarının büdcə öhdəliyi 4 faizə, sosial müdafiə və sosial təminat xərcləri isə 3 faizə yaxın artırılır. Azərbaycan neftinin büdcə qiyməti 65 ABŞ dolları götürülüb.

Ekspertlər bunu konservativ yanaşma hesab etməsələr də, bu addım qlobal bazardakı dəyişkənliyi nəzərə alır.

Millət vəkili Vüqar Bayramovun sözlərinə görə, Azərbaycan 2026-cı ildə də müdafiə qabiliyyətini gücləndirəcək:

“Eyni zamanda iqtisadi fəaliyyətə ayrılan vəsaitin artırılması da nəzərdə tutulur. Burada xüsusilə Qarabağ və Şərqi Zəngəzurun bərpası ön plandadır. Növbəti il büdcə xərclərinin 40 %-dən çoxu məhz sosial sahəyə yönəldiləcək. Bu da o deməkdir ki, pensiyaların indeksləşdirilməsi və artırılması olacaq və 1 milyon 100 min nəfər vətəndaşı əhatə edəcək. Sosial sahə ilə yanaşı, sahibkarlara dəstək, maliyyə resurslarına çıxış imkanlarının genişləndirilməsi də əsas prioritetlərdəndir”.

Büdcə gəlirlərinin 42,6 faizi və ya 16 milyard 350 milyon manatı neft-qaz sektorunun, 57,4 faizi və ya 22 milyard 73 milyon manatı qeyri-neft-qaz sektorunun payına düşür. Yəni 2026-cı il dövlət büdcəsi həm qeyri-neft gəlirlərinin artması, həm də sosial xərclərin üstünlüyü ilə diqqət çəkir.