Nazirlikdən qiymət artımı ilə bağlı mühüm proqnoz

Ərzaq və digər gündəlik istifadə məhsullarının qiymətində növbəti dəfə bahalaşma gözlənilir.

2023-cü ildə Azərbaycanda orta illik inflyasiyanın 10,4 % civarında olacağı proqnozlaşdırılıb. Bu barədə Maliyyə Nazirliyinin "2023-cü ilin dövlət və icmal büdcələrinin yarımillik icrasına dair arayış və ilin sonuna gözləntilər sənədi”ndə bildirilib.

İlkin proqnozlarda orta illik inflyasiya 6,9 % səviyyəsində nəzərdə tutulub. Ancaq Nazirlik qeyd edir ki, yenidən baxılma zamanı faktiki göstəricilər, gözlənilən meyillər nəzərə alınmaqla inflyasiyanın 10,4 % səviyyəsində olacağı proqnozlaşdırılıb. Qeyd edək ki, bu, ilkin proqnozdan 3,5 faiz bəndi çoxdur.

Bəs inflyasiya faizinin yüksəlməsinin səbəbi nədir və bu, qiymət artımına səbəb olacaqmı?

Bu barədə sorğuları cavablandıran iqtisadçı ekspertlər bildirirlər ki, inflyasiyanın artımı ərzaq məhsullarında və ümumən ölkədə qiymət artımına səbəb olacaq. İqtisadi dildə inflyasiya elə qiymət səviyyəsinin artması deməkdir. Yəni inflyasiya artıq qiymətlərdə artım olduğu üçün qeydə alınır. Əslində, inflyasiya keçən illə müqayisədə aşağı düşüb. Amma dünyadakı zəifləmə tempinə və Azərbaycana baxanda görürük ki, bu, gözlənilənə uyğun olmayıb. İnflyasiyanın artımı sadəcə dünyada baş verən iqtisadi proseslərlə əlaqədar deyil.

Ölkədə baş verən subyektiv səbəblər də inflyasiyanı artıran amillərdir. Həm də ölkə daxilində iqtisadiyyatın strukturunda ortaya çıxan məsələlər var. Ölkəyə mal gətirən bir neçə böyük şirkət var və onlar çox ləng şəkildə qiymət azalmasını əks elətdirirlər.