Prezident təqaüdünə layiq görülən tələbələrlə bağlı məlumat

Azərbaycan Respublikasının Prezidenti İlham Əliyev tərəfindən 2025–2026-cı tədris ilində ali məktəblərə daxil olan istedadlı tələbələrə Prezident təqaüdü verilməsi haqqında imzalanmış Sərəncamın detalları açıqlanıb. Bu Sərəncam ümumilikdə 102 nəfər gənci əhatə edir. Qürurverici haldır ki, təqaüdçülərin üçdə birindən çoxu – 36 nəfəri SOCAR-ın Bakı Ali Neft Məktəbi (BANM) tələbələridir. Bununla da BANM ardıcıl olaraq altıncı ildir ki, ölkə üzrə ən çox Prezident təqaüdçüsünə sahib olan ali məktəb kimi liderliyini qoruyur. BANM-in təltif edilən tələbələri arasında ən yüksək pay İnformasiya təhlükəsizliyi (11 nəfər) və Maliyyə (12 nəfər) ixtisaslarına düşür. Bu, xüsusilə yeni açılan Maliyyə ixtisası üzrə təhsil alan tələbələrin ilk ildən yüksək nəticələr göstərməsi baxımından mühüm əhəmiyyət daşıyır. Digər təqaüdçülər Kimya mühəndisliyi, Biznesin idarə edilməsi, Kompüter mühəndisliyi və Kompüter elmləri ixtisaslarında təhsil alırlar. Bu nəticə, Azərbaycanda ali təhsilin keyfiyyətinin və xüsusilə neft-qaz sənayesi ilə bağlı ixtisaslara olan marağın artdığını sübut edir.