“Qarabağ” yatağında seysmik kəşfiyyat işlərinin aparılması hansı imkanları yaradacaq?

Bu ilin dekabrın 1-də "Qarabağ" layihəsi üzrə seysmik tədqiqat proqramına başlanılacaq.

"BP-Azerbaijan" şirkəti xəbər verir ki, seysmik tədqiqatın 3,5 ayadək davam edəcəyi planlaşdırılır.

Layihə üzrə seysmik tədqiqat proqramına dənizdibi sensor qovşaqlarla (OBN) seysmik tədqiqat və yüksək dəqiqlikli (HR)/ultra yüksək dəqiqlikli (UHR) seysmik tədqiqat daxildir.

Məlumata əsasən, HR/UHR tədqiqatın 2026-cı ilin mart-aprel aylarında həyata keçiriləcəyi və 45 günədək davam edəcəyi nəzərdə tutulur. OBN seysmik tədqiqatın yataq haqqında daha dərin məlumatların əldə olunmasına, quyuların planlaşdırılmasına və yatağın işlənmə strategiyalarının təkmilləşdirilməsinə imkan yaradacağı gözlənilir.

Mənbə sahəsi 500 kvadratkilometr, qovşaq sahəsi isə 248 kvadratkilometr olacaq. Tədqiqat dənizin 140-200 metr dərinliyində aparılacaq.

"Qarabağ" müqavilə sahəsində OBN tədqiqatı üçün dənizdibi qovşaqların suya endirilməsində "Quba" gəmisindən istifadə ediləcəyi və seysmik mənbə gəmisi kimi "Murovdağ" gəmisindən istifadə gözlənilir.