Qlobal ərzaq qiymətləri indeksi açıqlandı | Qiymət artımına səbəb nədir?

Birləşmiş Millətlər Təşkilatının Ərzaq və Kənd Təsərrüfatı Təşkilatı oktyabr ayı üzrə qlobal ərzaq qiymətləri indeksini açıqlayıb.

İndeks oktyabrda sentyabr ilə müqayisədə 2 faiz artaraq 127,4 bənd olub. İndeks həmçinin bir il əvvələ nisbətən 5,5 faiz artaraq 2023-cü ilin aprelindən bəri ən yüksək səviyyəyə çatıb.

İndeksin ən yüksək səviyyəsinə çatmasına bitki yağı qiymətlərindəki kəskin artım səbəb olub.

Belə ki, palma, soya, günəbaxan yağlarının bahalaşması bitki yağı indeksini 7,3 faiz artırıb. Bu da son 2 ilin ən yüksək artım göstəricisidir.

Taxıl qiyməti indeksi isə buğda və qarğıdalı ixracı qiymətlərindəki artıma görə oktyabr ayında bir əvvəlki ayla müqayisədə 0,9 faiz yüksəlib.

Eyni zamanda şəkərin qiymət indeksi 2,6 faiz artıb. Süd məhsullarının qiymət indeksi isə oktyabrda sentyabr ayı ilə müqayisədə 1,9 faiz, 2023-cü ilin eyni dövrünə nisbətən 21,4 faiz bahalaşıb. Ətin qiymətinə gəlincə isə müvafiq indeksdə oktyabr ayında sentyabr ayına nisbətən 0,3 faiz azalma olub.