"Azərbaycana regiona açılan bir qapı kimi baxmağa dəvət edirəm" | Mikayıl Cabbarov - Baku TV

Bakıda Azərbaycan-Slovakiya biznes-forumu keçirilib.

Tədbirdə hər iki ölkədən rəsmilər və 100-ə yaxın şirkət nümayəndəsi iştirak edib.

Forumda çıxış edən Azərbaycanın iqtisadiyyat naziri Mikayıl Cabbarov iki ölkə arasında strateji tərəfdaşlığın iqtisadi əlaqələrin inkişafı üçün möhkəm zəmin yaratdığını bildirib. Diqqətə çatdırılıb ki, Azərbaycanın nəqliyyat-logistika imkanları, eləcə də investorlar üçün təqdim edilən güzəştlər işbirliyi üçün yeni imkanlar açır.

Eyni zamanda Slovakiyanın Baş nazirinin müavini, iqtisadiyyat naziri Denisa Sakova ölkəsinin Azərbaycanla iqtisadi əlaqələrin inkişafında maraqlı olduğunu vurğulayıb. Qeyd olunub ki, iki ölkənin biznes dairələri arasında birbaşa təmasların artırılması, qarşılıqlı investisiya imkanlarının dəyərləndirilməsi iqtisadi münasibətlərin daha da möhkəmlənməsinə töhfə verə bilər.

Forumda çıxış edən Azərbaycan Respublikasının İxracın və İnvestisiyaların Təşviqi Agentliyinin (AZPROMO) icraçı direktoru Yusif Abdullayev və Slovakiyanın İnvestisiyalar və Ticarətin İnkişafı Agentliyinin (SARIO) xarici ticarət departamentinin rəhbəri Daniel Ondruş iki qurum arasında ixrac və investisiyaların təşviqi, biznes dialoqunun dəstəklənməsi istiqamətində əməkdaşlığın davam etdiyini vurğulayıblar.

Tədbir çərçivəsində həmçinin Azərbaycan Turizm Bürosu və “Slovakia Travel” milli turizm təşkilatı arasında işbirliyinin inkişafını nəzərdə tutan Əməkdaşlıq Memorandumu imzalanıb.

Eyni zamanda iki ölkənin biznes və investisiya imkanlarına dair təqdimatlar keçirilib.