"ƏDV geri al" layihəsinin əhatə dairəsi genişləndirilir

Gələn ildən Vergi Məcəlləsinə ediləcək yeni dəyişikliklər çərçivəsində vətəndaşlara “ƏDV geri al” mexanizmi üzrə daha çox vəsait qaytarılması nəzərdə tutulur.

Bu barədə Milli Məclisin deputatı Vüqar Bayramov jurnalistlərə açıqlamasında bildirib.

Deputatın sözlərinə görə, təklif edilən layihəyə əsasən, bərbərxana, gözəllik salonu və kosmetoloji mərkəzlər tərəfindən göstərilən xidmətlərə görə də “ƏDV geri al” mexanizminin tətbiqi həyata keçiriləcək. Bununla da həmin xidmətlərdən istifadə edən vətəndaşlar ödədikləri məbləğin bir hissəsini geri ala biləcəklər.

V.Bayramov qeyd edib ki, yeni qaydaların əsas məqsədi bu sahələrdə şəffaflığı artırmaq və nağdsız ödənişləri stimullaşdırmaqdır.

“Bu dəyişikliklər istehlakçıların ödədikləri vəsaitin bir hissəsini geri almağa imkan yaratmaqla yanaşı, sözügedən sahənin “ağarması” prosesini sürətləndirəcək”, ‒ deyə o əlavə edib.