SOCAR göstəriciləri açıqladı | Neft və qazın maya dəyəri niyə artıb?

2024-cü ildə Azərbaycan Dövlət Neft Şirkətinin hasil etdiyi 1 ton neftin maya dəyəri 160 manat 51 qəpik təşkil edib.

Bu barədə şirkətin yaydığı hesabatda bildirilib.

Sənədə əsasən, bu dövrdə neftin maya dəyəri 2023-cü ilin müvafiq dövrü ilə müqayisədə 16 manat 91 qəpik və ya 11,8 faiz artıb.

Hesabatda deyilir ki, maya dəyərinin artması yanacaq, elektrik enerjisi, əməkhaqqı və sosial sığorta, nəqliyyat və digər xərclərin artması hesabına baş verib. Bu dövrdə həmçinin SOCAR-ın istehsal etdiyi min kubmetr qazın faktiki istehsalının maya dəyəri 80 manat 25 qəpik təşkil edib. Bu da 2023-cü illə müqayisədə 4 manat 22 qəpik və ya 5,5 faiz çoxdur.

Bildirilib ki, qazın hasilatına "Azərkontrakt" Açıq Səhmdar Cəmiyyətindən alışına və idxala çəkilən xərclərlə yanaşı, qazın emalı, saxlanması, nəqli və paylanması xərcləri də nəzərə alınmaqla 2024-cü ildə SOCAR üzrə satılan 1000 kubmetr qazın faktiki xərci 176 manat 82 qəpik təşkil edib.

Qeyd edilib ki, qazın maya dəyərinin artması əsasən keçən ilə nisbətən əmtəəlik qaz hasilatının azalması hesabına baş verib.