SOCAR-ın idarə rəisi beynəlxalq konfransda çıxış edib - Baku TV

Azərbaycan Dövlət Neft Şirkəti iqlim dəyişikliklərinə, xüsusilə metan emissiyaları məsələsinə ciddi yanaşır.

Bunu SOCAR-ın Ekoloji Məlumatların Açıqlanması və Yaşıl Təşəbbüslər İdarəsinin rəisi Mustafa Qurbanlı Ümumdünya Ətraf Mühit Gününə həsr olunmuş beynəlxalq konfrans çərçivəsində keçirilən "Metan Azaldılması üçün Birgə Fəaliyyət: Kənd Təsərrüfatı, Enerji və Tullantı Həlləri" adlı panel müzakirəsində çıxışı zamanı bildirib.

Onun sözlərinə görə, metan emissiyalarının qarşısının alınması tək bir qurumun səyləri ilə mümkün deyil. SOCAR beynəlxalq təşəbbüslərə qoşulub və onlardan birinin həmtəsisçisidir. Şirkətin təsis etdiyi platformaya çoxsaylı beynəlxalq təşkilatlar və ölkələr qoşulub. Qısa və ortamüddətli hədəflərə nail olunması mütəmadi hesabatlarla nümayiş etdirilir.

Mustafa Qurbanlı qeyd edib ki, beynəlxalq təşəbbüslərlə yanaşı, regional əməkdaşlığın inkişafına da xüsusi önəm verilir. Bu yanaşma ortaq problemlərin həlli üçün regionda fəaliyyət göstərən şirkətlərlə daha sıx əməkdaşlıq etməyə imkan yaradır.

"Biz heç kimi geridə qoymamaq fəlsəfəsi ilə fəaliyyət göstəririk. Emissiyaların azaldılması prosesi yalnız bizim şirkətin deyil, bütün tərəfdaşların birgə məsuliyyətidir. 2050-ci ilə qədər müəyyən edilmiş hədəflərə çata biləcəyimizə əminik", – deyə o bildirib.