SOCAR-ın “Yaşıl istiqraz"larına abunə yazılışı başladı | Son tarix açıqlandı

Dövlət Neft Şirkətinin bərpaolunan enerji layihələrini dəstəkləmək məqsədilə buraxdığı “Yaşıl istiqraz”larına abunə yazılışı başlayıb.

“SOCAR Capital”dan verilən xəbərə görə, nominal dəyəri 1000 ABŞ dolları olan SOCAR istiqrazları sahiblərinə 6% illik gəlir qazandıracaq.

İstiqrazlar 5 illik müddətə buraxılır və kupon ödənişləri hər 3 aydan bir ödəniləcək. Ümumi buraxılış məbləği 200 milyon ABŞ dolları təşkil edən istiqrazları əldə etmək üçün son tarix bu ilin fevralın 28-dir.

“Yaşıl istiqraz”lardan əldə olunan vəsait ölkəmiz üçün prioritet elan edilmiş “yaşıl” enerji layihə və investisiyalarına sərf ediləcək. Belə ki, SOCAR “Yaşıl Gəlir, Yaşıl Gələcək” şüarı altında buraxdığı bu istiqrazları ilə vətəndaşlara etibarlı və davamlı gəlir imkanı qazandırmaqla yanaşı, ekoloji cəhətdən təmiz enerji mənbələrinin inkişafını dəstəkləmək niyyətindədir. Eyni zamanda Azərbaycanın “yaşıl” enerji sahəsindəki təşəbbüslərinə töhfə vermək yeni emissiyanın başlıca məqsədlərindən biridir.

“PAŞA Kapital” İnvestisiya Şirkətinin anderrayteri olduğu SOCAR-ın “Yaşıl” istiqrazlarını 1 və 5 saylı “ASAN xidmət” mərkəzlərindəki SOCAR istiqrazları köşklərindən, o cümlədən ölkəmizdə qeydiyyatdan keçmiş investisiya şirkətlərindən əldə etmək mümkündür.