SOCAR və IE Universiteti arasındakı əməkdaşlıq çərçivəsində vacib tədbir - Baku TV

SOCAR və IE Universiteti arasında potensial əməkdaşlıq çərçivəsində IE Universitetinin professoru Alberto Levy tərəfindən SOCAR əməkdaşları üçün süni intellekt mövzusunda seminar təşkil olunub.

Seminar zamanı süni intellektin müasir biznes mühitinə təsiri, idarəetmə və qərarvermə proseslərində yaratdığı transformasiya, eləcə də təşkilatlar üçün formalaşdırdığı yeni imkanlar və strateji perspektivlər müzakirə olunub.

Professor Alberto Levy çıxışında süni intellekt texnologiyalarının artıq qlobal iqtisadiyyat və idarəetmə modellərində dönüş nöqtəsinə çatdığını və təşkilatların bu texnoloji transformasiyaya çevik şəkildə uyğunlaşmasının böyük əhəmiyyət daşıdığını qeyd edib.

Tədbir SOCAR əməkdaşlarının innovativ texnologiyalar və rəqəmsal transformasiya sahəsində məlumatlılığının artırılması, həmçinin beynəlxalq səviyyədə akademik tərəfdaşlarla bilik və təcrübə mübadiləsinin genişləndirilməsi məqsədilə təşkil olunub.