SOCAR və “Özbəkneftqaz” şirkəti birgə təhsil proqramı təşkil edəcək

Azərbaycan Dövlət Neft Şirkəti və “Özbəkneftqaz” şirkəti magistratura ixtisası üzrə birgə təhsil proqramının təşkili barədə razılığa gəlib.

Belə bir qərar SOCAR-ın vitse-prezidenti Ziba Mustafayevanın başçılıq etdiyi Azərbaycan nümayəndə heyətinin Özbəkistana səfərinin yekununda qəbul edilib.

2023-cü ilin iyulun 18-də “Özbəknefteqaz” şirkəti ilə SOCAR arasında kadr hazırlığı sahəsində əməkdaşlığa dair imzalanmış Memorandumun icrasını təmin etmək məqsədilə təşkil olunmuş səfər çərçivəsində SOCAR-ın nümayəndə heyəti, “Özbəkneftqaz”ın rəhbərliyi və kadrlar şöbəsinin əməkdaşları ilə görüşlər keçirib.

Həmçinin “Özbəkneftqaz” və SOCAR şirkətlərinin dəstəyi ilə Daşkənd Kimya-Texnologiya İnstitutu və Bakı Ali Neft Məktəbinin magistratura pilləsində birgə təhsil proqramının təşkili barədə razılıq əldə olunub.

Birgə təhsil proqramına uyğun olaraq magistrlər 1 il Daşkənd Kimya-Texnologiya İnstitutunda, 1 il isə Bakı Ali Neft Məktəbində təhsil alacaq və hər iki təhsil müəssisəsinin diplomunu əldə edəcəklər.