Tbilisidə SOCAR-dan elektrikli avtomobillər üçün yeni layihə - Baku TV

Azərbaycan Dövlət Neft Şirkəti (SOCAR) Tbilisidə Cənubi Qafqaz regionunda ilk tam elektrik enerjisi ilə işləyən doldurma stansiyasını istifadəyə verib.

“Report”un məlumatına görə, layihə regionun enerji transformasiyası istiqamətində mühüm addım kimi qiymətləndirilir.

Yeni stansiya yalnız elektrikli nəqliyyat vasitələri üçün nəzərdə tutulub və Gürcüstanda ekoloji təmiz nəqliyyatın inkişafına töhfə verməyi hədəfləyir.

Layihə SOCAR-ın ESG prioritetləri və korporativ sosial məsuliyyət strategiyasına uyğun olaraq həyata keçirilib. Stansiya dörd şarj qurğusu ilə təchiz olunub və eyni vaxtda altı elektromobilin enerji ilə təmin edilməsinə imkan yaradır. Onlardan ikisi 120 kVt gücündə sürətli şarj cihazıdır və dörd avtomobili təxminən 40 dəqiqəyə tam doldura bilir. Digər iki 22 kVt-lıq şarj qurğusu isə müştərilərin stansiya ərazisində yerləşən mağaza və kafedə vaxt keçirdiyi müddətdə istifadə üçün nəzərdə tutulub.

Məlumata əsasən, obyekt qismən günəş enerjisi ilə işləyir. Hazırda şirkətin Gürcüstanda altı yanacaqdoldurma məntəqəsində günəş panelləri quraşdırılıb və bu infrastrukturun genişləndirilməsi planlaşdırılır.